Facebook : ఫేస్బుక్ ‘పోక్’ ఫీచర్: పాత ట్రెండ్కు కొత్త హంగులు:సామాజిక మాధ్యమ దిగ్గజం ఫేస్బుక్ తన పాత యూజర్లకు బాగా గుర్తుండే ‘పోక్’ ఫీచర్ను మళ్లీ తెరపైకి తీసుకొచ్చింది. దశాబ్దం క్రితం యువతను విశేషంగా ఆకట్టుకున్న ఈ ఫీచర్కు కొత్త హంగులు అద్ది, మరింత సులభంగా ఉపయోగించేలా మార్పులు చేసింది.
దశాబ్దం తర్వాత ఫేస్బుక్లో మళ్ళీ ‘పోక్’ ట్రెండ్
సామాజిక మాధ్యమ దిగ్గజం ఫేస్బుక్ తన పాత యూజర్లకు బాగా గుర్తుండే ‘పోక్’ ఫీచర్ను మళ్లీ తెరపైకి తీసుకొచ్చింది. దశాబ్దం క్రితం యువతను విశేషంగా ఆకట్టుకున్న ఈ ఫీచర్కు కొత్త హంగులు అద్ది, మరింత సులభంగా ఉపయోగించేలా మార్పులు చేసింది. స్నేహితులను సరదాగా కదిలించడానికి, ఆటపట్టించడానికి ఉపయోగపడిన ఈ ఫీచర్ మళ్లీ బలంగా పుంజుకుంటోందని ఫేస్బుక్ అధికారికంగా ప్రకటించింది.
‘పోక్’ గత చరిత్ర
2010లలో ఫేస్బుక్లో ‘పోక్’ ఒక పెద్ద ట్రెండ్. ఒకరినొకరు పలకరించుకోవడానికి, సరదాగా ఏడిపించడానికి, కొందరైతే ఫ్లర్టింగ్ చేయడానికి కూడా ఈ ఫీచర్ను విరివిగా ఉపయోగించేవారు. ‘పోక్’ వస్తే వెంటనే ‘పోక్ బ్యాక్’ చేయడం యూజర్లకు ఒక సరదాగా ఉండేది. అయితే కాలక్రమేణా ఈ ఫీచర్పై ఆసక్తి తగ్గిపోవడంతో దాని వాడకం దాదాపుగా ఆగిపోయింది.
ఇప్పుడు ఈ పాత ట్రెండ్కు మళ్లీ జీవం పోయాలని ఫేస్బుక్ నిర్ణయించింది. ఇందులో భాగంగా, ఇకపై యూజర్లు తమ స్నేహితుల ప్రొఫైల్ పేజీలో ‘మెసేజ్’ బటన్ పక్కనే ‘పోక్’ బటన్ను సులభంగా యాక్సెస్ చేయవచ్చు. అంతేకాకుండా, ఎవరు ఎన్నిసార్లు పోక్ చేశారో లెక్కలు చూసుకోవడానికి, పాత పోకులను గుర్తుచేసుకోవడానికి ఒక ప్రత్యేక పేజీని కూడా అందుబాటులోకి తెచ్చింది.
నిజానికి ‘పోక్’ ఫీచర్ ఉద్దేశం ఏంటో ఫేస్బుక్ ఎప్పుడూ అధికారికంగా వివరించలేదు. “మీరు మీ స్నేహితులను పోక్ చేయవచ్చు. అలా చేసినప్పుడు వారికి ఒక నోటిఫికేషన్ వెళ్తుంది” అని మాత్రమే దాని సపోర్ట్ పేజీలో పేర్కొంది. అయితే, యూజర్లు మాత్రం దానికో అర్థాన్ని సృష్టించుకుని తమదైన శైలిలో వాడేశారు. కొత్తగా తీసుకొచ్చిన ఈ మార్పులతో, తెలియని వ్యక్తులను ఇబ్బంది పెట్టకుండా కేవలం స్నేహితులకు మాత్రమే పోక్ చేసేలా పరిమితి విధించారు. ఈ నిర్ణయం పాత యూజర్లలో మళ్లీ ఆసక్తిని రేకెత్తిస్తోంది.
